Häzirki wagtda milli Liderimiz tarapyndan amala aşyrylýan ykdysady özgertmeler toplumy halk hojalygyny diwersifikasiýalaşdyrmagy, önümçilige iň täze we döwrebap tehnologiýalary ornaşdyryp, öňki bar bolanlarynyň durkuny täzelemegi öz içine alýar.

Soňky ýyllarda maglumat tehnologiýalary çalt depginler bilen ösýär. Munuň özi maglumat gorunyň yzygiderli artmagyna, olaryň hemişe täzelenip durmagyna itergi berýär.

Mary welaýatynyň “Türkmenstandartlary” döwlet gullugynyň Döwlet synag barlaghanasy dünýäniň iň kämil tehnologiýalary, öňdebaryjy kompaniýalaryň döwrebap enjamlary bilen üpjün edildi. Bu enjamlaryň ýurdumyzda öndirilýän we daşary ýurtlardan getirilýän önümleriň hilini kesgitlemek boýunça geçirilýän synaglaryň takyklygyny gazanmakda ähmiýeti uludyr.

Önümleriň fiziki-himiki synaglary geçiriş bölüminde durmuş himiýa harytlary:geýim ýuwujy we ýumşadyjy serişdeler; suwuk we gaty sabynlar; parfýumer-kosmetik harytlary; kremlar; duş üçin gel we şampunlar; çagalar üçin ýaglar; diş pasta we çotka; kanselýar harytlary: reňkli we beýleki kagyzlar, ruçka, marker, pozguç, flomaster, gündelik, okuw depderleri ýaly harytlar, plastik massalardan ýasalan hojalyk üçin niýetlenen önümler, keramiki aşhana gap-gaçlary, suwenirler, poslama durnukly polatdan gap-gaçlar, aýnadan ýasalan gap-gaçlar we bezeg önümleri kadalaşdyryjy resminamalaryň talaplaryna laýyklykda takyk synaglar geçirilýär.

Bölümde synag edilýän önümlere durmuş-hojalyk maksatly harytlar, şol sanda keramikadan ýasalan önümler degişli bolup, olar adamzadyň durmuşyna giňden ornaşan we gündelik ulanylýan önümleriň biridir. Keramiki önümleriň adam saglygyna howpsuz bolmagyny, sertifikatlaşdyrmak boýunça kadalaşdyryjy resminamalaryň talaplaryna laýyk gelmegini gazanmak üçin bölümiň hünärmenleri synaglary ýokary takyklykdaky enjamlaryň kömegi bilen geçirýärler.