Lebap welaýatynyň «Türkmenstandartlary» döwlet gullugynyň synag barlaghanasynyň demir we rezin önümleriniň hilini kesgitleýän bölüminde, esasan, alýumin önümleri bilen birlikde, bolt, wint, şpilka, gaýka, lenta, kompozit panel, sim, list, profil, armatura, flanes, homut ýaly polat önümleri; ýeňil hem ýük awtoulaglaryň pnewmatiki şinalary, manžetler we basyşly sorujy şlanglar ýaly rezin önümleri synag edilýär. TDS-22233-2001 kadalaşdyryjy resminamasynyň talaplaryna laýyklykda, alýumin profilleriň himiki düzümi Italiýanyň «G.N.R.» kompaniýasynyň «METAL LAB PLUS» kysymly spektrometri arkaly kesgitlenilýär. Takyk hem ygtybarly netije almak üçin synag üç gezek geçirilýär. Ortaça netije hasaba alynýar we resmileşdirilýär. Polat önümleriniň synagynda hem ýokarda ady agzalan enjam ulanylýar. Enjam demir erginleriniň himiki düzümini kesgitlemäge mümkinçilik berýär. Bölümde Italiýanyň «MATEST» kompaniýasynyň aňrybaş güýç çägi 200 kN we 600 kN bolan berkligi barlaýan enjamlary hem hereket edýär. Enjamlar armatura, sim, turba we beýleki önümleri süýndürmek hem üzmek arkaly, olaryň berklik çägini kesgitleýärler. Germaniýanyň «Testing Servise» kysymly enjamynda pnewmatiki şinanyň statistiki disbalansyny (deňagramlylygyny), germetikligini (jebisligini), beýikligini, inini we diametrini kesgitleýäris. Pnewmatiki şinanyň, polat önümleri bolan gaýkanyň, flanesiň, turbanyň gatylygyny barlamak üçin Russiýa Federasiýasynyň «ТЭМП-2» kysymly dýurometri peýdalanylýar. Farhat ERGAŞEW, Lebap welaýatynyň «Türkmenstandartlary» döwlet gullugynyň synag barlaghanasynyň demir we rezin önümleriniň hilini kesgitleýän bölüminiň başlygy. “STANDART, HIL WE HOWPSUZLYK” žurnaly №1, 2022